Viro Illustri,
D[OMINO] D[OCTORI] BERNHARD[O] de JUSSIEU,
Professori Botanices Parisiensi,
Amico Venerando,
Carol[us]
Linnaeus.
In itinere Botanico, impensis Regiis constitutus mihi obviam venit amicus
antiquus D[ominus] Sohlberg, nuncius Regis nostri (Expres) ad nostrum
Legatum Parisiis vestris degentem; data itaque oportunitate & occasione, has breve
exaravi literas.
Tractatus isti, quos desiderasti, a me post reditum in patriam impressos &
compactos, literisque inclusos circa initium anni composui; vestro Legato dedi, sed
nimis graves cum navi se eosdem missuros benignus promisit; praestabitque procul
omni dubio. In his ad Tuas ultimas responsum dedi.
Pro bulbis Orchidum missis iterum devotissimam mentem reddo; diu haesere apud
Legatum vestrum; prodiere tamen omnes, floruere etiam, sed tantum militares hiante
cucullo.
Iter suscipio ad Insulas maris Balthici, Oelandiam Gotlandiamque; redibo, si faveat
numen, mense augusti circa finem. Ibi plantas marinas, muscos et petrificata
investigabo sedulo.
Nunc Dei gratia a miserrimo servitio praxeos Holmiae liberatus sum. Spartam
tandem obtinui, quam desideravi diu. Jussu Regis in Academia Upsaliensi nuper
Professor Medicinae & Botanices factus sum, sicque Florae redditus, a qua exul per 3
annos nunc Holmiae inter aegros vitam degi. Si vita viresque a me aliquid in Botanicis,
ut spero, videbis.
Orationem inauguralem de progressu, fatis & statu Botanices (in hoc seculo) habui,
ubi publice Tuas preedicavi, ut potui & deb[u]i, laudes, ne me ingratissimum reperires.
A Medicinae studiosis post annum, qui vestras adeant academias, quanti Tuum nomen
fecerim, exaudies ipse.
Saluta Venerandum Fratrem Tuum et amicos omnes nostros communes D[ominum]
Isnard, Laserre, viduam Vaillantii, D[ominum] Obriet et omnes alios, Dominum qui
Brasiliam adiet.
Quid de fratre Tuo? Quid de Ejus observatis? Quaeso, respondeas, scribasque
saepius.
Si vixero post Septembris proximam diem, responsa dabo eodem die ad Tuas,
quoties hisce me beatum velis.
Ter Vale, Vivasque omni amico major!
Dabam Norkopiae d[ie] 19 maji stylo veteri
1741.
[Address]
Monsieur
Monsieur Bernhard
de Jussieu
Docteur du
Medecine
Professeur en Botanique
Membre de L’academie
Paris