Viro Illustri,
D[OMINO] D[OCTORI] BERNH[ARDO] JUSSIEU,
Professori regio Parisino,
Botanico consummatissimo,
S[alutem] p[lurimam]
d[icit]
C[arolus] Linnaeus.
Literas et libros quas, Vir Illustris, ad me misisti cum Entio, ut et Delacroixii
Systema morborum, per D[ominum] Royenum rite accepi; pro omnibus devota mente
grates reddo maximas. Utinam locus umquam concederetur mihi ad mutua praestanda
officia!
Tua, Vir illustris, fratrisque tui Maximi facilitas, Tuus in exteros favor, in plantas amor,
in Botanophilos generositas non a paucis mihi demonstrata sunt et impressa adeo, ut
non possim non, quin Parisiis [sic] adeam sub initio mensis Maji. Felix ego si Tuum
obtinuero favorem, Felix si mihi concedas videre Tuas Tournefortianasque collectiones
plantarum. Felix si per Te profectus quosdam facere possim in studio, cujus insatiabili
inflammatus sum desiderio. Suam mihi concessere gratiam quotquot adivi antea
Botanicos, nec Te his difficiliorem fore spero, sed longe benigniorem persuasus iter
ingredior.
Laetus dudum cognovi Fratris tui, junioris natu, vigorem et profectus in ultimo Peru;
de ejus successu ad innumera detegenda rara nuper exempla et documenta vidi apud
amic[um] D[ominum] v[an] Royen, ubi tot semina plantarum rariorum praesertim
Plumerianarum, quot nunquam vidi antea.
Nova nulla referam. Reservabo in tempus, quo coram loqui licet. Litteria hic nulla
ullius momenti. D[omini] Jac[quini] Sherardii obitus forte innotuit, qui nullum legatum
D[omino] Dillenio fecit, quod miror maxime. D[ominus] Amman edit plantas rariores
Siberiae et Tartariae, nec non (sed in Actis Petropolit[anis]) Tr[actatum] de filicibus,
quarum species duplicia folia gerunt, alia sterilia alia fructifera. Siegesbeckii
Botanosophia verior nuper edita sat stulta et mendax est, uti omnia Ejus. Vateri Hortus
Wittenbergensis nuper editus nec non Ludwigii canones Botanici non visi sunt
etiamnum a me.
Halleri ambae Dissertationes de Veronicis alpinis et Pedicularibus pro more Viri
doctissime conscriptae et elaboratae sunt. Breynius edat patris sui plantas nomine
modo recensitas in fasciculis, cum descriptionibus et figuris ac vita auctoris.
Gronovius propediem edat Floram Virginensem, Burmannus vero plantas rariores
Africae per decurias; tabulas pro prima centuria incisas vidi. Post occiduum Lugduni
prodibunt meae Classes plantarum, ubi exposui omnes methodos a fructificatione
desumtas uti Caesalpini, Morisoni, Raii, Knauti patris, Hermanni, Boerhaavii, dein
Rivini, Ruppii, Ludwigii, Knauti, tum Tournefortii, Pontederae, demum Magnoli,
novamque aliam e calice, tandem sexualem et methodi na[tur]alis fragmenta, ultimo
partiales uti Vaillantii et Pontederae in Compositis; Morisoni et Artedi in Umbellatis;
Raj[i] et Scheuzeri de Graminibus, Dillenii et Michelii de Muscis et fungis, &c., addito
synonimo generico.
Prodiit et Artedi Ichtyologia, ubi prima in parte Bibliotheca ichtyologica.
2o Philosophia Ichtyologica. 3o Genera, eorum
Characteres et species cum suis differentiis. 4o Pinax omnium nominum,
uti Bauhini in Botanicis, hic in Ichtyologicis. 5to Descriptiones. Omnes
qui videre hoc opus fassi sunt, quod in ista parte non visum fuerit. Vita authoris et
editio cum variis aliis a me descripta et peracta sunt.
Vale, Vir illustris et fave peregrino!
Dabam die 28 Mart[ii] 1738. Amstelaedami.