Viro Sapientissimo, Celeberrimoque,
Carolo Linnaeo, Equiti Aurato etc.,
S[alutem] Pl[urimam] D[icit]
Carolus Allionius.
Offero tibi, Vir Sapientissime, his litteris inclusa paucula semina, quae, ut grata tibi sint vehementer opto. Exilis status Horti Regii Taurinensis meae nunc temporis curae commissi; non sinit majoris momenti et plura semina offerre. Proxime sequenti autumno longe plura me posse porrigere confido. Nullam enim diligentiam pretermitto, ut Pedemontii stirpes in hortum conferam, et ab amicis plura semina expecto.
Nullus dubito, quin alter nostrarum stirpium fasciculus intercedente opera Bernardi Jussiaei ad te pervenerit. Paratum habeo tertium fasciculum alpinarum stirpium, quem proximo mense aprili mittam ad Sueciae Consulem in Sardinia degentem.
Maxima horti Taurinensis inopia motus ad te confugio, Praestantissime Botanices parens, teque enixe rogo, ut velis nonnulla rariorum exoticarum stirpium semina communicare. Supra modum me tibi devincies, nullique diligentiae parcam, ut Italicas stirpes tibi porrigere queam. Vale, Vir sapientissime, meque habe tui nominis cultorem observantissimum!
Dabam Aug[ustae] Taurinorum die 12 januarii 1761.
Semina mittere operis aut ad Praecl[arum] Johannem Burmannum aut ad Nobilissimum Virum Comitem La Marmora, Legatum Regis Sardiniae apud Batavos Hagaecomitum degentem. Horum Cl[arissimorum] Virorum opera tua munera prompte ad manus meas venient.
[Address]
A Monsieur
Monsieur Linnaeus Chevalier
de l’Etoile Polaire et Trés Célebre
Professeur d’Histoire Naturelle etc.
a Stockholm.