Viro generosissimo atque praenobilissimo,
D[omino] D[octori] C[arolo] a Linné,
Archiatro regio, Equiti splendissimo,
Professori celeberrimo etc., etc.,
s[alutem] p[lurimam] d[icit]
J[ohannes] C[hristianus] Fabricius.
E litteris TUIS novissimis in Hollandia acceptis novam et sane singularem de
fungis theoriam laetus accepi. Diu iam miratus fui fungos chemice in prima
destillatione haud acidum uti vegetabilia, sed Alkali uti animalia praebere, observante
Geoffroyeo. Me quidem haud fugit principia chemica saepius in historia naturali
fallacia, attamen saltem aliquid ponderis novae theoriae afferunt. Structura cum
Zoophytis et Lithophytis admodum convenit, quamvis substantia differat. Optarem
sane accurationem de tanta observatione ideam, quum mihi ipsi microscopia ad hoc
negotium apta desunt.
Ante aliquot dies a parva excursione in montosis Scotiae instituta reveni. Liceat
nunc observata, quamvis pauca, summo praeceptori communicare.
Constat haec regio e rupibus sterilissimis, altis, nudis, Erica cinerea et vulgari
undique tectis. Arboreta omnino nulla, fruteta pauca et vix alia nisi plantata, e Corylo,
Betula, Alno, Ulice, Rosis et Rubis. Unde plantae nemorosae et umbrosae hic
rarissimae. Lacus et paludes undique abundant. Plantas inveni quasdam alpinas,
quamvis montes Scotiae vix Alpes nominandae, quum raro per totum annum nivem
conservant. Inveni vero Veronicam alpinam, Spaghnum alpinum, Lycopodium alpinum,
Sibbaldiam, Fragariam sterilem, Cerastium alpinum, Saxifragam stellarem, hypnoidem,
Rubum chamaemorum, Festucam viviparam, Monotropam, Pilulariam, Astragalum
arenarium, Plantaginem unifloram, Chrysosplenium oppositifolium, Zosteram,
Saniculam, Saxifragam Hirculum, Pyrolam secundam, Caricem pulicarem, Trollium
Europaeum, Ophrydem cordatam, Alchemillam alpinam cum Lichenibus variis, quorum
quosdam omnino novos credo, quos vero amicissimus Zoega TEcum communicabit.
Insectorum parvam admodum quantitatem cepi, quorum tantum duo novas credo
species.Lepisma cauda tripili, seta intermedia longiore, abdomine subtus
filoso.
Forbicina teres saltatrix Geoff. Hist. des Ins. II. p. 614. n. 2.
Habitat frequens inter lapides Maris Edinburgici.
Statura L[epismae] vulgaris at duplo maior. Corpus gibbum squamis varie coloratis
nitentibus tectum. Antennae longitudine dimidii corporis. Sub abdomine ex unoquoque
segmento dependet seta filiformis, brevis et sub cauda duo longiores inflexae, quibus
agilissime saltat fere uti Podurae. Cauda tripilis extensa seta intermedia longiori. Affinis
videtur Poduris at statura et Cauda omnino Lepismae.
Cancer parasiticus manibus scabris, cauda apice callosa unguiculata.
Habitat in fissuris rupium maris Edinburgici conchas varias intrans.
Parvae obscure cinerascens. Margo supra oculos obsolete bispinosus. Chelae
ovatae punctis prominulis scabrae. Pedes quatuor postici breviores, obtusi, reflexi
unguiculo brevissimo. Cauda cylindrica, mollis terminata callo globoso unguiculato.
Hydra triticea F[au]n[ae] Su[ecicae] copiosissime hic rupibus adhaeret et nuperrime
mihi asseveravit D[ominus] Schun Minister Bamfensis hydram triticeam esse ova
Buccini lapilli, quum ipse vidisset, Buccinum hoc ova ad latera vasis apposuisse.
Continet certe eandem materiem aut humorem purpurascentem ac Buccinum lapillus.
Dubitavit idem etiam, ne Alcyonium digitatum ova essent Patellae vulgaris, quod
tamen in dubito reliquit. Sententiam TUAM de hac observatione avide exspecto.
E regno minerali mineras inveni haud paucas inprimis cobalti, plumbi, cupri et ferri.
Crastino die iter Londinum versus inchoabo, si itaque me litteris TUIS beare velis, ut
eas ad Zoegam mittas etiam atque etiam rogo.
Ut TU nobilissimaque familia diu incolumes floreatis meque benevolentia VESTRA
haud dedignetis ferventi pectore opto.
Dabam Edinb[urgi] d[ie] XVII Sept[embris] 1767.
Hisce includo novam Balani Speciem, margine baseos laciniato, quam
heri in frustulo rupis Faeroensis inter alia corpora marina inveni. Utinam modo
integram et illaesam acciperes. Vale J[ohannes] Zoega.