Illustri[ssimo] et Celeberrimo Viro,
D[omino] Carolo Linnaeo,
Eq[uiti] de stella polari &c. &c.,
Scientiae Naturalis Instauratori,
Totique
Eruditissimo
Societatis Regiae Scientiarum,
Upsaliensis Coetui,
Novam
hanc Lacertae speciem
Donat, dedicat
Joannes Scopoli Phys[icus] Idriensis.
Inter res Naturales in Carnioliae Ducatu a me primo detectas, non infimum
locum sibi vendicat, novum hoc Amphibium, quod vivum nuper Labaco misit
doctissimus Amicus R[everendissimus] P[ater] Franciscus Xav[erius] Wulfen e
Soc[ietate] Jesui, estque iuxta Systema Nat[urae] Celeberr[imi] Equitis Caroli Linnaei.
9. caeca. Lacerta cauda ancipiti brevi, palmis tridactylis, plantis didactylis.
Habitat in aquis dulcibus, quae ex cryptis subterraneis effluunt civia Sittich, non
frequens.
Descript. Corpus iners, teres, nudum, lubricum, pollicis humani crassitie.
Caput teretiusculum, leniter depressum, pone crassius, attenuatum, ore obtuso,
mandibula inferiore breviore, oculis nullis, sed horum loco tuberculum prominens
caecum, Crista utrinque auriformis, constans arbusculis 3-4, cinnaberini coloris,
Maxilla utraque dentata, oris rictus parvus, vix trium linearum.
Pedes antici digitis tribus, postici duobus, unguibus nullis.
Variat 1o statura pedali, colore ubique albo, crista gulae
quadrifida.
{tab}{tab} 2o statura et colore, qualem icon ostendit, crista gulae
trifida.
Victitat cochleis exiguis, quae in aquis dulcibus apud nos copiosae, quarum
specimina pariter submitto.
Animal ipsum, una cum Sepia Sepiola, conservo in Sp[iritu] vini, illudque Tibi, Vir
Celeberr[ime], submittam, una cum Upupa muraria et radicibus ac speciebus
plantarum, quas a me petere dignatus es; id unum rogo, ut curam res hasce excipiendi
Tibique mittendi committere velis Viennae D[omino] Jacquin, Tibi aliunde noto.
Quamprimum capsula illa, insectis, plantis, lapidibus plena, quam Tibi transferendam
D[omino] Gronovio misi per D[ominum] Jacquin ad Te venerit, ut monere digneris,
rogo. Interim vale, Vir Celeberrime, et porro me ama!
Dab[am] Idriae 3 maii 1762.
Si rescribere placuerit, dirigendae litterae, hunc in modum:
Wienn – Labac. Idria.