Ex ora Africae occidentali redux, de meo in Galliam adventu certum te facere volui. Historiae Naturali et Physicae a puero deditus, amicorum consiliis suasus, iter quinque annorum ad terras aequinoxiales in concessione Senegal nuncupata susceperam. Cum mihi per Litteras D[omini] B[ernhardi] Jussieu compertum fuerit me notum tibi propter plurima mea in hac scientia, et Botanica praesertim, observata, quae quotannis ad Academiam Parisiensem legenda mittebam, te diutius de meo reditu ignorare, nec mei animi nec meae in meritissimum Botanicum benevolentiae fuisset. Tua uti familiaritate et consuetudine velim; et quidem de historiae naturalis arcanis tecum litteris tractare, simul de observatis in exteris regionibus, cum per praesentia licebit negotia, primum mihi erit. Multa in his nova, plurima ab autoribus imperfecte descripta, et adhuc plura ad genera male relata accuratis observationibus detexi, ut et tibi videre erit in opere, quod anno proxime sequenti sum editurus. Sed de his alias fusius. Nunc, quod tibi gratius erit, Semina Senegalensium et antea nemini cognitarum Plantarum accipias. Nova tantum tibi Novem mitto genera, et quantum in Epistola licet contineri, ut ex iis judices, et caeteri judicent Botanici, quantum adhuc restet in Botanica agendum ad perfectam artificialis methodi rationem instituendam. Haec genera sub numeris nostris sic veniunt. N° 15. Bdellifera arbor, i. e. ex qua fluit gummi- resina Bdellium dicta. N° 33, N° 42. Kahower, qui et cerasus Europaeorum, N° 53. 76. 98. 101. 109. et 213.
De iis si notum quid fuerit, praesertim quoad Bdellium, scribas. Sub nomine Thuris ab Europaeis indigitatur, et hujus loco ad usum Ecclesiarum in Europam mittunt. Sed ab eo licet non multum differat, per examen tamen, omnia huic cum Bdellio esse communia facile de- monstratur. Me plura dicere vetat tempus; haec conjunctissimi animi pignora sufficiant, usque dum otium suppetat plura mittere.
Salutem tibi plurimam dicit cl[arissimus] B[ernhardus] Jussieu. Vale! Negotia Botanica prosequere, rei herbariae lumen adjice! Ego, quoad nova et adhuc incerta, officia mea praestandi occasionem laeto animo accipiam.
Tibi Deditissimus et Devotissimus cultor
Adanson.
Parisiis 28a Junii 1754.