Clarissimo Linnaeo suo
S[alutem] D[icit]
Joannes Burmannus.
Ante paucos dies D[omino] Balguierio tradidi cistam plantis Capensibus
siccis repletam, quam ad te navi jam misit, ut & novam descriptam plantam
Wachendorfiam fictili inpositam, cujus characterem & descriptionem nunc tibi mitto;
quam si dignam censeas, ut actis vestris Suecicis inseratur, erit mihi gratissimum,
tumque membris communices, quaeso, illustrissimae ac celeberrimae vestrae
societatis, quumque hi in societatem suam me adsciscere velint, uti olim in Litteris tuis
id mihi officiose obtulisti, tum in posterum alias quasdam novas nondum descriptas vel
observatas communicabo plantas, quarum plurimas possideo.
Semen Wachendorfiae jam incipit maturescere, quod dein itidem mittam, sique
juxta numeros plantis Capensibus adnotatos velis mihi nomina generica tradere, quae
ex floribus facile detegere poteris, rem mihi facies acceptissimam, simulque addere
illustrationes Iconum Plumier[ii], quas antea & jam denuo mitto; prosequar tum ipsarum
descriptionem & editionem, licet dolendum sit, tam paucos reperiri Botanophilos, qui
hoc Opus desiderant vel emunt, quum multum, ut puto, contribuat ad illustrationem &
cognitionem tot rarissimarum plantarum, unde fere animus cadit nec sumtus sinunt, ut
in integrum absolvatur, praesertim quum fata & injuria temporum adeo premant & per
bella sint iniquissima.
Si quid mittas, addas, quaeso, dissertationem de Euphorbiis & Centurias binas
plantarum, uti & quasdam alias, si quae sunt novae, quibus cum taedio destituor.
Uxor mea adhuc debilissima saevissimis quotidie luxatur doloribus intestinorum ac
partium muliebrium.
Valeas, Vir Amicissime, cum tota tua illustriss[ima] familia!
Dabam ex praedio raptim!
2 Augusti 1757.
P. S. Nuper occupatus in Herbario Oldenlandi, cujus plantis nomina
genuina adscribo, inveni te in speciebus tuis ad Asteris speciem pulcherrimam, qui
nempe est Aster Afric[anus] frutescens splendentibus parvis & reflexis foliis, hunc
primo ad Xeranthemum ciliatum no. 7 retulisse, dein iterum Aster reflexus no. 28 idem
habet synonymon Commel[ini]; an ex proposito an vero erroneum est. Moneo hoc
tantum, ut dein posses adnotare vel mutare.
Valeas amicissime!
N.B. In memorato Herbario binas distinctas inveni plantas, quarum una foliola
tantum reflexa, altera reflexa & ciliata simul gerit foliola, floresque tantum verticales
multo majores ramosque simplicissimos erectos, rarioribus ramulis minoribus
interspersis, floribus destitutis, atque haec videtur ad Xeranthemum adcedere.