Fautori suo aestumatissimo
S[alutem] P[lurimam]
Joannes Bartsch.
Debitas pro unctione transmissa ultima persolvo grates, nullus dubitans, quin
ea viribus suis neutiquam destituta, sit remedium universale potentissimum; cuinam
adplicari debeat, nescio. Quid sibi velint primae epistolae Tuae lineae, me fugit
arcanorum imperitissimum. Dedicationem, si Tibi placeret, suaderem retinendam illam,
quae a societate transmissa. Auctorum nomina apud me sancte adservantur. Jamdudum
dubitavi, num Te per ferias Lugdunum excipere posset, immo negativam Te praesente
libere praedixi. Sic iubent fata, quae sequamur lubenter. Quodsi meum desideres serio
adventum, indices, rogo, non diem modo, verum etiam horam, tumque simul
sequentes, quas habeo, adferam plagulas impressas. Quodsi haec frustra a me
exspectari velis, culpa in Te solum cadet. Alias oportet, ut necessario hasce ferias
petam Amstelodamum;hinc commode fieri posset absque ulla suspicione. Dubium me
relinquit Boerhaavius, quoniam nullam ex eo habui responsionem; forte non aegre
ferret, si occasione quadam arrepta ei de novo anno gratulaturus responsionem
quaererem. Ceterum hae ultimae, quas accipis a me, litterae preces meas ad Te ferunt
ultimas, ut cum Tuo, quem veneraris merito, Mecaenate, annum hunc finias laetissime,
Tuum vero in me favorem nunquam, aut non nisi infaustissime. Vale!
Dab[am] Lugd[uni] Bat[avorum] MDCCXXXVII. VIII Kal[endas] Jan[uarii].
A Monsieur
Monsieur Linnaeus
Docteur en Medicine
à
Hartekamp.
by myn Hr Cliffort.