D[omino] D[octori] Carolo Linnaeo,
Historiae Naturalis cultori et promotori felicissimo,
heroi suo et amico colendissimo,
Bene valere
De Sauvages.
En iterum litteras, numquid frequentia et prolixitate taediosas aut permisisti,
imo jussisti, ut ad te, data quavis occasione, scriberem! Scribo itaque; nuper
scripseram humanissimis tuis respondens et millenas agens gratias, quod meum vile
nomen plantae novae, pro tua in me benevolentia ex munificientia, adscripseris. Sex
circiter naves hacce hyeme huc vel potius ad oppidum Cette, quatuor leucis
hinc distans, appulere, tres adhuc ibi remorari me monent; utrum fasciculum theseωn
[sic] aliis navibus anno recens elapso commissum acceperis ignoro; alterum
proinde, si deus velit, jam accepturus es; in quo fasciculo pathologia methodica, et
dissertationes quatuor vel quinque una de somno, altera de lumbagine a discipulis
meis in lucem editae, tertia de febris causa, quarta de Natura rediviva, quinta, Gallice
scripta, de bombycis educatione, tractant.
Operibus tuis botanicis carere nequaquam possum, ex quo maxime proffessorio
hoc botanices munere me oneravit vel honoravit Rex Galliae. Habeo certe Generum
tuorum primam editionem, Criticam Botanicam prima parte truncatam, Floram
Lapponicam, bibliothecam, Systema mirabile Naturae heu nimis
contractum et methodum sexualem. Vide, quot praeclara desint opera, quae auro
mihi pretiosiora sunt, nec auro tamen obtinere valeo et comparare. Nam Hortum
Cliffortianum, quod attinet eum a D[omino] Cliffort precibus obtinere nondum valui;
tuorum Generum alteram editionem expectat vicinus bibliopola; plures exoptant
Botanici.
Alteri classium morborum editioni aut potius compositioni, ut mandatis tuis
obtemperem, lubens insudo; ast vix concipi potest, quam ingratus sit hic apud
nostrates labor, cum nullus repperiatur bibliopola aut typographus, qui optima etiam
scripta, aere suo velit in lucem edere. Opus autem ad normam tuorum generum,
tuaeque potius icthiologiae, conscribere decrevi, in aliquot tomos divisum, quibus
singulis una vel et altera morborum classis enucleata comprehendatur. Sed hac de re
tuum et auxilium et consilium prius expecto.
Desideratur autem in re herbaria, catalogus methodicus omnium quotquot
hactenus notae sunt specierum, quem tu solus potes in lucem edere, aptis generum
et praesertim, quod deest, specierum nominibus insignire. Interea vero quidquid hac
in re meae inopiae supplere potest, quaeso, concedas. Vidi Bibliothecam Botanicam
in 4to amici olim mei D[omi]n[i] Seguier Nemausensis, editam Leydae,
et exemplar ab ipso authore praestolor; ibi alta est eruditio et catalogus scriptorum in
re Botanica, sed nulla methodus, quae juvet aut doceat.
Vale medicinae et historiae naturalis decus ac me tui studiosissimum amare perge!
Monspelii 1° aprilis 1741.
Si quid humanitas tua ad me miserit, hoc dirige sic A Monsieur Monsieur
Causse prieur de Cette à Cette pour faire rendre à M[onsieur] de
Sauvages proffesseur en médecine à Montpellier.
]Address]
donnés 14 [...] au garcon[a]
A Monsieur
Monsieur Linnaeus docteur
en médecine, médecin real de la
flotte suedoise, proffesseur d’histoire
naturelle, president de la societé
des sciences
en Suede a Stockolm
TEXTUAL NOTES
a. MS1 [added on the envelope]